Журналист Жолдасбек Дуанабай қайтыс болды
facebook.com
Саналы ғұмырын қазақ руханиятының, қазақ журналистикасының дамуына арнаған танымал журналист Жолдасбек Дуанабай дүниеден өтті, деп хабарлайды zakon.kz "Жас Алаш" газетіне сілтеме жасап.
Қаламы жүйрік, сөзі өткір, елдің мұңын мұңдап, жоғын жоқтаған журналист қай тақырыпты қаузап жазса да, айтар ойы халықпен үндес болды. Қазақ руханиятына өлшеусіз үлес қосқан Жолдасбек Дуанабай досқа адал, кішіге қамқор болған азаматтық болмысы бір төбе еді. Елдің жайын үнемі електен өткізіп отыратын ол бар ғұмырын журналистикаға арнады.
Жолдасбек Дуанабай бірнеше жыл қазақ басылымдарына елеулі еңбек сіңірді. Республикалық "Айқын", "Жас қазақ" газеттерінің бас редакторының орынбасары қызметін атқарды.
Еңбек жолын "Лениншіл жастан" бастаған ол соңғы алты айда "Жас Алаш" газетінде жауапты хатшы қызметін атқарды.
Қай жұмысты да жауапкершілікпен атқара жүріп, шығармашылық ізденістерін ешқашан тоқтатқан емес. Қарымды қаламгердің басылым беттерінде жүргізген арнайы айдарларын оқырман жылы қабылдап, оның еңбегі мемлекет тарапынан ескеріліп, арнайы марапаттарға да ие болды.
Жолдасбек Дуанабайдың ел тәуелсіздігін жариялап, кем-кетігін түгендей бастағанда тілімізді, мәдениетіміз бен өнерімізді, салт-дәстүрлерімізді дәріптеп, насихаттауға қаламының күшімен-ақ көп еңбек сіңірген.
