Алматы дәріханаларында қырғын кезек. Сағынтаев үндеу жасады

facebook.com/sagintayev.b

Қаланың дәрі-дәрмек нарығында дүрбелеңге жол жоқ. Жағдай бақылауда.

Алматы әкімі Бақытжан Сағынтаев қаладағы дәріханаларда кезек көбейіп, жұрт арасында дүрлігу байқалғанын мойындап, осы жәйтке түсініктеме берді, деп хабарлайды zakon.kz.

Сағынтаев қаланың дәрі-дәрмек нарығында дүрбелеңге жол жоқ деді. Оның сөзінше, жағдай бақылауда. Құқық қорғау органдары жұмыс істеп жатыр. Алыпсатарлар жазаланады.

Бұл туралы әкім Facebook-те жазды:

Сұранысқа ие препараттарға деген қажеттілікті тұрақтандыру үшін 1 шілдеден бастап дәріханаларға 475 мың дана әлеуметтік маңызы бар препараттар, соның ішінде 260 мың парацетамол, 98 мың аспирин, 35 мың ингавирин, 22 мың азитромицин, 15 мың кардиомагнил және басқа да дәрі-дәрмектер түсті. Сондай-ақ дәріханаларға 30 мың термометр қойылды.

Қоймаларда әлеуметтік маңызы бар 645 мың дәрі-дәрмек, соның ішінде 301 мың аспирин, 84 мың кардиомагнил, 73 мың парацетамол, 42 мың ибупрофен, 26 мың амоксиклав және басқа да дәрі-дәрмектер бар.

Күн сайын қаладағы 105 дәріханаға дәрі-дәрмектер жөнелтіледі. Бірақ олар тез сатылып кетуде. Десе де, іркіліс болмайды. Шілде айының соңына дейін 1,2 млн аспирин, 930 мың парацетамол, ибупрофеннің 350 мыңы, ингавириннің 100 мың қаптамасы, 80 мың азитромицин, 40 мың тамифлю және басқа да әлеуметтік маңызы бар дәрілер жеткізіледі, - делінген жазбада.

Оқи отырыңыз