Солтүстік Қазақстанда ауыл тұрғындары малын жаппай сойып алып жатыр

2 Шілде 2021, 09:24
Сурет: lightfieldstudios.net

Солтүстік Қазақстанда ауыл тұрғындары мал көтерем болды деп дабыл қағып отыр. Шаруалар амалсыздан енді төрт түлікті сатуға мәжбүрміз дейді, деп хабарлайды zakon.kz Астана ТВ-ға сілтеме жасап.

Жазды күні сүтті 15 литрден кем бермейтін Шарнияс Рустеновтың ірі-қарасының өнімі биыл сегіз литрге әзер жетіп отыр. Ауылда жем -шөптің тапшылығынан төрт түлік азайып жатыр. Бірнеше жыл бұрын елді-мекен тұрғындары өрісте 200-ден астам түлік өргізсе, биыл ол алты есе азайған.

Шарнияс РҮСТЕНОВ, БЕРЕЗОВКА АУЫЛЫНЫҢ ТҰРҒЫНЫ:

10 жылқым бар еді. Бағатын жер болмаған соң, 300 шақырым жерде тұратын құдама апарып тастадым. Ауылдың жан-жағынан диқандар жерді қопарып тастаған. Шөп шабатын жер жоқ. Ауылда 30-ақ мал қалды. Оның өзі ұзаққа жетпес. Жұрт сойып тастайтын шығар.

Максим Ищук 200-ге жуық түтіні бар Березовка ауылына былтыр көшіп келген. Үлкен ферма ашып, мал басын көбейтуді көздепті. Бірақ жайылым жоқ болған соң, ол ойы жүзеге аспаған.

Максим ИЩУК, БЕРЕЗОВКА АУЫЛЫНЫҢ ТҰРҒЫНЫ:

Ауылдың бір жағында әскери полигон тұр, екінші жағында егістік алқаптары. Бізді қысып тастаған. Мал бағатын жер жоқ. Мал арық. Кәсіп бастау үшін несие алғым келген. Енді одан айнып қалдым. Ауылда шамамен 500 гектар жер тапшы.

Шенеуніктер бұл мәселеден хабардар. Олардың жайылым жетіспеушілігіне қатысты айтар уәжі бар.

Бибігүл МУСИНА, СҚО ҚЫЗЫЛЖАР АУДАНЫ РОЩИНСК АУЫЛДЫҚ ОКРУГІНІҢ БАС МАМАНЫ:

Шаруашылықтардың көбі жерді конкурс арқылы алған. Кейбіреуі осы уақытқа дейін пайдаланылмай жатты. Енді диқандар оны шұғыл түрде игере бастады. Осыған байланысты жайылымдық жер азайып қалды.

Бұл тек осы ауылға қатысты проблема емес. Көп-елді мекенде мал бағатын шөбі шүйгін жер жоқ.

Жалғас СҮЛЕЙМЕНОВ, СҚО ЖЕР ҚАТЫНАСТАРЫ БАСҚАРМАСЫ БАСШЫСЫНЫҢ ОРЫНБАСАРЫ:

Біз Қызылжар ауданының әкімдігіне жайылымдық жерлерді кеңейту туралы тапсырма бердік. Биыл 20 мыңға көбейту жоспарда бар. Березовка ауылы да соның құрамында. Сондай-ақ, бүгінде шаруашылықтармен оларға бөлінге жерді қарапайым тұрғындарға беру туралы меморандумдар жасалып жатыр.

Әкімдіктегілер әскери полигонмен келісуді де көздеп отыр. Биыл құзырлы орындар биыл ауыл шаруашылығы кәсіпорындарынан 77 мың гектар алқапты қайтарып алып, тұрғындар игілігіне берген.


zakon.kz жаңалықтарын оқыңыз
Жазбаларды көрсету

Көп оқылғандар

барлық жаңалықтар

ЖАҢАЛЫҚТАР

қате туралы хабарлау
Қате туралы хабарлау
Қате мәтін:
Түсініктеме:

Маңызды жаңалықтарды білгіңіз келе ме?