"Астана" телеарнасының хабарына қарағанда, өткен аптада су қоймасына тәулігіне орта есеппен 42 млн текше метр су құйылған. Сыйымдылығы 5 млрд 200 млн текше метрлік су қоймасы тез толып жатыр.
Ал мамандар бұл мәселеге үкімет назарын аударуы қажет деп, дабыл қағып отыр. Өйткені Шардара –еліміздегі ең үлкен су қоймасы. Арнасынан асса, 34 мың халқы бар 22 елді мекенді су басу қаупі бар.
"Қазгидромет" РМҚ Түркістан облыстық филиалының басшысы Махамбет Жазықбаевтың айтуынша, Шардара былтырғы осы күнмен салыстырғанда 100 пайыз артық толып отыр.
Экология, геология және табиғи ресурстар министрлігіне наурыз айына дейін "Шардара" су қоймасының толуын 70%-дан асырмау және "Көксарай" су қоймасына су толтырмау бойынша ұсыныс хат жолданған. Жауапты тұлғалар бұдан бөлек қауіпсіздік мақсатында мен апатты жағдайдың алдын алу үшін Үкімет деңгейінде штаб құру керек деп есептейді.