Өзбекстанның Жизақ облысында нөсер жауын салдарынан болған сел бес адамның өмірін қиды, деп жазды Sputnik Қазақстан.
Облыс прокуратурасының хабарлауынша, төтенше жағдай салдарынан тағы алты адам әртүрлі ауырлықтағы дене жарақатын алған, тергеу жүріп жатыр.
Төтенше жағдайлар министрлігі таратқан мәлімет бойынша, табиғи апаттан облыс бойынша 100-ден астам адам эвакуацияланып, 260 үйді су басқан, оның 53-і толығымен қираған.
Самарқанд облысында да тұрғын үйлер мен көшелерді су алды, Қашқадария мен Науаи облыстарында су тасқыны болды.
Синоптиктердің болжамы бойынша, алдағы 10-15 жылда тұрақты жылыну үрдісі (орташа температураның жылына 1,5%-ға артуы) жауын-шашынның ұлғаюына әкеледі, бұл су тасқыны саны мен сел белсенділігінің артуына әкеледі.
2021 жылғы шілде айында Қырғызстанмен шекаралас Өзбекстанның шығысындағы Наманган облысында нөсер жауын салдарынан сел жүріп, 8 адам қайтыс болды, тағы 6 адам жарақат алды.