Newsweek басылымының жазуынша, жаңа сыртқы жарнама науқаны аясында цифрлық билбордтар күннің қозғалысына сәйкестендіріліп бапталған. Соның нәтижесінде тағам бейнелері тек ауызашар уақыты басталған соң ғана экранда пайда болады. Бұл бастама ораза ұстап жүрген мұсылмандар тарапынан жағымды пікір тудырды.
Күндізгі уақытта цифрлық жарнамалық экрандарда брендтің қаптамалары бос немесе жабық күйде көрсетіледі. Ал күн батқан сәтте сол қаптамаларда тамақ бейнесі шығады. Яғни, мұсылмандар ауыз ашатын мезетте жарнамадағы тағам бейнесі де қатар пайда болады.
Әлеуметтік желілерде бұл билбордтардың таңертеңгі және кешкі уақыттағы көрінісі жарияланған.
Сурет: Х/MediaCat
"Аталған технологияны немістің Scholz & Friends жарнама агенттігі әзірлеген. Тұжырымдаманың негізінде – Рамазан айында ораза ұстайтын жандарға құрмет білдіру мақсатында McDonald's брендіне тән ең танымал визуалды элемент – тағам бейнесін уақытша алып тастау идеясы жатыр",- делінген ақпаратта.
Басылым мәліметінше, Германияда жыл сайын Рамазан айын шамамен алты миллионға жуық мұсылман атап өтеді.