Бұл кәсіби мереке әскер өмірін насихаттап, қоғамның Қарулы күштерге деген сенімі мен құрметін қалыптастырып жүрген журналистерді бір арнаға тоғыстырды.
Қорғаныс ведомствосы басшысының атынан құттықтау сөз сөйлеген министрдің орынбасары вице-адмирал Серік Борамбаев әскери журналистердің армияның беделін арттырудағы, объективті ақпарат таратып, қоғамда отансүйгіштік сезімді нығайтудағы маңызды рөлін атап өтті.
Ол сондай-ақ ҚР Ұлттық ұланы мен ҰҚК Шекара қызметі баспасөз қызметінің өкілдерін, Медиа-контент орталығы мен "Сарбаз" газетінің редакциясын кәсіби мерекемен құттықтады.
Салтанатты жиынға республикалық телеарналар мен басылымдардың журналистері, танымал блогерлер және Қорғаныс министрлігінің баспасөз қызметі мен "Қазақстан сарбазы – Воин Казахстана" газетінің қалыптасуына атсалысқан әскери журналистиканың ардагерлері қатысты.
Кездесу соңында вице-адмирал Серік Борамбаев қатысушыларға кәсібилігі, адалдығы және отандық әскери журналистиканың дамуына қосқан үлесі үшін грамоталар мен алғыс хаттар табыс етті.
Бұл іс-шара Отан қорғаушылардың өмірі мен қызметі туралы алғашқы болып хабар тарататын адамдарға деген құрмет пен ризашылықтың жарқын дәстүріне айналды.