Еңбек және халықты әлеуметтік қорғау министрлігі әлеуметтік желілер мен мессенджерлерде зейнетақы төлемдерін қайта есептеу арқылы оны 30-50%-ға арттыру туралы ақпараттың шындыққа жанаспайтынын хабарлайды. Әрі бұл ақпаратта интернет-алаяқтық белгілері барын нақтылайды.
Айта кетсек таратылған бейнероликте зейнетақыны арттыру үшін 20 жылдан бастап еңбек өтілі және еңбек кітапшасында белгілі бір жазба болуы керек деп айтылады. Бұл жағдайда роликтің авторы оның қандай жазба екенін білу үшін сілтемеге өтуді сұрайды.
"Азаматтарға тексерілмеген сілтемелерге өтпеуге, сонымен қатар алаяқтар пайдалана алатын күмәнді интернет-ресурстарда өздерінің жеке деректерін қалдырмауға кеңес береміз. Ақпаратты тек ресми көздерден пайдалануды сұраймыз", делінген ресми хабарламада.
Сондай-ақ құзырлы ведомство жалған ақпарат тарату заңмен қудаланатынын еске салады.
