Маман менингиттің өте ауыр дерт екенін, оны неғұрлым тез анықтау маңызды екенін баса айтты. Көбіне ауру қыс-күз мезгілінде өршиді. Бұған температураның ауытқуы, жоғары ылғал, жабық мекемеде ұзақ болу (микробтардың таралуы мен көбеюіне қолайлы орта) ықпал етеді. Сондықтан төменде көрсетілген белгілердің кез келгені байқалған жағдайда, дереу емханаға бару немесе жедел жәрдем шақыру керек.
"Менингитті ЖРВИ-мен шатастыру оңай. Өйткені белгілері ұқсас - жөтел және мұрынның ағуы, жоғары температура, бастың ауруы, құсу. Менингит кезінде бас қатты ауырады. Сонымен қатар бала көз және мойынның ауырсынуына шағымдануы мүмкін. Құсады, ауыр интоксикация болады. Егер менингококцемия қосылса, теріде геморрагиялық бөртпе пайда болады. Нәрестелерде болатын симптомдар: жоғары температура, мазасыздық, тоқтаусыз жылау, емшектен бас тарту. Жіті кезең өте жылдам өтуі мүмкін (яғни баланың жағдайы жақсарады, одан кейін ауыр асқыну болады). Менингитті ауру басында тек анализ арқылы анықтауға болады", - дейді Дилдора Кенжаева.
Педиатр менингит дер кезінде анықталса, оны бактерияға қарсы терапия арқылы сәтті емдеуге болатынын айтты. Кешіксе, аурудың асқыну ықпалы жоғары: интеллект төмендейді, ми ісінеді, құрысу, кереңдік, соқырлық, паралич, тіпті өлімге әкелуі мүмкін.
"Ауру қарқынды дамиды. Менингиттің кез келген этиологиясы бар науқас стационарда емдеуді қажет етеді. Тәулік бойы медициналық бақылауда болады. Уақытылы емделу нәтиже береді", - деп толықтырды дәрігер.
Өзіңізді және балаларыңызды менингиттен қорғау үшін жеке гигиенаның негізгі ережелерін сақтау керек: тамақ ішер алдында қолыңызды дұрыстап жуыңыз, көкөніс пен жемісті мұқият жуыңыз, қайнаған сумен шайыңыз. Тек қайнатылған немесе бөтелкедегі суды ішіңіз. Адам көп жиналатын жерден аулақ болыңыз және бөлмелерді жиі желдетіңіз.
