Алматы ақшамы газеті байқауға түрлі телеарналардың, мерзімді басылымдар мен ақпараттық агенттіктердің 32 өкілі қатысқанын жазды. Бұл күні корреспонденттер, репортерлер, редакторлар, операторлар – бір сөзбен айтқанда, барлық қалам иелері мен таспагерлер микрофон мен диктофонын бильярд тастаяғына алмастырды. Турнир шымылдығы мемлекеттік Әнұранмен ашылып, турнир демеушілері мен ардагер журналистер қатысушыларға бата-тілектерін білдіріп, сәттілік тіледі.
Жарыс бірнеше турдан тұрды. Кіл мықтының ішінен ең мықтыны анықтау оңайға соққан жоқ. Қатысушылардың қарқыны финалға дейін бәсеңдемеді.
Сегіз сағатқа созылған тартысты додада «Еуразия» бірінші арнасының шеф-редакторы Меймеш Үмбетәлі топ жарып, 1-орынды иеленді.
2-орын «Alatay Aqparat» медиа-холдингі бас директорының орынбасары Нұржан Шынтаевқа бұйырды.
Үздік үштікті «Алматы» телеарнасының операторы Мұратбек Алмасхан толықтырды.
Турнир соңында жеңімпаздарға «Вечерний Almaty» және «Almaty aqshamy» газеттерінің атынан арнайы сыйлықтар табысталды.
Айта кетерлік жайт, «Вечерний Almaty» газетінің алғашқы саны 1936 жылы 28 сәуірде жарық көрді. Қазір оның таралымы 36 мың дананы құрайды.
