27 шілдеде Ұлытау облысы полиция департаменті Жаңаарқа полиция бөлімінің кезекші бөліміне ауданның шаруа қожалықтарының бірінің қызметкерінен бейтаныс тұлғалардың 29 жылқыны ұрлағаны туралы арызданған.
Бұл факт ҚР Қылмыстық кодексінің 188-1-бабы 4-бөлігі бойынша тіркелді.
Жәбірленушінің айтуынша, бейтаныс адамдар жылқыларды тасымалдау үшін тіркемесі бар жүк көлігін пайдаланған.
Жамбыл және Түркістан облыстарында жедел-іздестіру іс-шараларын жүргізу кезінде 26 және 28 жастағы екі күдікті анықталып, ұсталды. Олар қылмысты жасағанын мойындаған. Жедел-іздестіру жұмыстарын жүргізу барысында Түркістан облысы Қазығұрт ауданының елді мекендерінің бірінен ұрланған 7 жылқы мен автокөлік тәркіленді.
Қазіргі уақытта күдіктілер ҚР ҚПК-нің 128-бабы тәртібінде ұсталып, Жезқазған қалалық полиция басқармасының уақытша ұстау изоляторына қамауға алынды.