10 қыркүйек күні сағат 21:16-да Атбасар аудандық полициясының кезекші бөліміне Екатеринбург – Алматы тасжолында орналасқан Нұрлыжол кафесінің жанында, 998-шақырым жол қиылысында жол апаты болғаны және зардап шеккендер бар екені туралы хабар түскен.
Оқиға орнына барған тәртіп сақшылары Атбасар қаласының 43 жастағы тұрғыны мінген КамАЗ көлігінің Екатеринбург – Алматы автожолымен жүріп келе жатып, Toyota Estima көлігіне соқтығысқанын анықтады.
Апат салдарынан оқиға орнында Toyota Estima автокөлігінің 72 және 57 жастағы жолаушылары қайтыс болды. Тағы екеуі түрлі жарақат алып, ауруханаға жеткізілді.
Осы фактіге қатысты ҚР Қылмыстық кодексінің 345-бабы 4-бөлігі бойынша ("Көлік құралдарын басқаратын адамдардың жол жүрісі немесе көлік құралдарын пайдалану ережелерін бұзуы") бойынша сотқа дейінгі іс жүргізу басталды.
