Синоптиктер Алматы мен Атырау қалаларының тұрғындары мен қонақтарын сенбіде болатын қолайсыз метеорологиялық жағдайлар туралы ескертеді.
Қолайсыз метеожағдайлар (ҚМЖ) - атмосфералық ауаның беткі қабатында зиянды (ластаушы) заттардың жиналуына ықпал ететін қысқа мерзімді метеорологиялық факторлардың (тымырық, желдің болмауы, тұман, инверсия) жиынтығы. ҚМЖ пайда болған кезде елдімекендердегі атмосфералық ауа сапасының нашарлауы мүмкін.
Ластану деңгейінің қалыптасуын анықтайтын маңызды факторлардың бірі - синоптикалық жағдайдың болжамы (жел, жауын-шашын, ылғалдылық, ауа температурасы).
Қолайсыз ауа райы жағдайында мынандай кеңес ұсынылады:
- ашық ауада, әсіресе тас жол немесе басқа ластану көздерінің жанында көп жүрмеу керек;
- балалар мен жүкті әйелдер ұзақ серуендеуден бас тартуы керек;
- өкпенің созылмалы ауруларымен, жүрек-қан тамырлары, аллергиялық аурулармен ауыратын адамдар ашық ауада болған кезде өздерімен бірге дәрі-дәрмектерін ала жүруі тиіс;
- ашық ауада физикалық белсенділікті шектеңіз. Дене шынықтыру және спортпен шұғылдану жабық спорт кешендерінде жүргізіледі.
Қазгидромет мамандары алдағы үш күнге арналған ауа райы болжамымен бөлісті. Болжамға сәйкес, еліміздің басым бөлігінде бұл күндері жауын-шашын болады: жаңбырдың арты қарға ұласады.