Панфилов ауданының әкімі Тәуелсіздікке жаңа смартфон сыйлады

Қазақстан Тәуелсіздігінің 20 жылдығы қарсаңында дүние келген тұңғышына ата-анасы Тәуелсіздік деген есім берген. Бұл ерекше есімді мақтанышпен алып жүрген ол қазір 12 жаста, деп хабарлайды Zakon.kz.

Тәуелсіздік Батырбекұлының отбасы Панфилов ауданы Көктал ауылында тұрады. Ата-анасы мал шаруашылығымен айналысады. Нүсіповтардың үш баласы бар.

"1986 жылғы желтоқсан оқиғалар кезінде көп жас қаза тапты, олардың екеуі біздің Панфилов ауданынан болады. Ләззат Асанова Ақжазық ауылында дүниеге келген (қазір Айдарлы), мектепті бітіргеннен кейін музыкалық училищеге түсіп, 1986 жылы желтоқсанда түсініксіз жағдайда қайтыс болды. Кейін шындықтың беті ашылып, ол сол қатал күндердің символына, қаһарманына айналды. Ербол Сыпатаев біздің ауылдан шыққан. Ол Алматыда энергетика институтының 2-ші курсында оқып жүрген. Желтоқсан оқиғасы кезінде алаңда болып, сол кездегі қырғында қаза тапты. Міне, осы және басқа да көптеген өрімдей қыз-жігіттер бүгінгі еліміздің тәуелсіздігі мен егемендігіне соқпақ жол салып берді", – деді Батырбек Нүсіпов.

Баланың әкесінің айтуынша, мұндай ерлікті ұмытуға еш болмайды. Қазіргі және болашақ ұрпаққа сол уақыттың жарқын сәттерін ұдайы жеткізіп отыру керек.

Сурет: Zakon.kz/Лариса Штоппель

"Тұңғышымыз дүниеге келсе, тіпті Тәуелсіздік күніне дейін де әйелім екеумізде "ұлымызға Тәуелсіздік деген есім берсек қалай болады" деген идея келді. Иә, ерекше атау, бірақ оның мағынасы терең. Көптеген адам таң қалды, бірақ бұл есім баламызға бақыт әкелетіндігіне сенімді болдық. Қысқасы, осылай болды. Біздің ұлымыз атына лайық адам болып өсіп келеді. Ол қазір - 12 жаста, 7-сыныпта оқиды. Мұғалімдер оның еңбекқорлығын, адалдығын, аса жауапты екенін мақтап айтып отырады. Ол оқу үздігі, сынып басшысы. Қоғамдық жұмыстармен айналысқанды, достарына және мұқтаж адамдарға көмектескенді ұнатады. Біз ұлымызды мақтан тұтамыз!"- деп сөзін қорытындылады Батырбек Нүсіпов.

Панфилов ауданының басшысы ерекше есімді баланы айтулы датада елеусіз қалдырмады. Мереке қарсаңында әкім Тәуелсіздікке жаңа смартфон сыйлады.

Сонымен қатар, Жетісу облысының әкімшілігі Талдықорғанда желтоқсан оқиғасына қатысушылардың құрметіне ескерткіш орнату туралы шешім қабылдағаны белгілі болды. Бүгінгі таңда қалалық комиссия бірнеше эскиздік жобаларды қарастырып үлгерген. 

Алматы облысы Талдықорған
Жаңалықтан zakon.kz сайтында хабардар болыңыз: