Алматы прокуратурасының мәліметінше, жер сілкінісі кезінде әлеуметтік желілерде және мессенджер чаттарда табиғи апаттың салдары туралы көрінеу жалған хабарламаларды орналастыру фактілері тіркелді, ал бұл тұрғындар арасында дүрбелең және кең қоғамдық резонанс тудырды.
Мұндай әрекеттерді жасау фактілері бойынша қазіргі уақытта 1995 және 2006 жылдары туған екі әйелдің жеке басы анықталды.
"Аталған тұлғаларға Қазақстан Республикасының Әкімшілік құқық бұзушылық туралы кодексінің 456-2-бабының 3-бөлігі ("Онлайн-платформаларды пайдаланушылардың қоғамдық тәртіптің, азаматтардың немесе ұйымдардың құқықтары мен заңды мүдделерінің не қоғамның немесе мемлекеттің заңмен қорғалатын мүдделерінің бұзылуына жағдай жасайтын жалған ақпаратты орналастыруы, таратуы, егер бұл әрекеттерде қылмыстық жазаланатын іс-әрекет белгілері болмаса") бойынша 10 айлық есептік көрсеткіш мөлшерінде айыппұл салынып, әкімшілік жауаптылыққа тартылды", - делінген хабарламада.
Прокуратура бұл бағыттағы жұмыс жалғасып жатқанын хабарлады.
