Облыстық полиция департаментінің баспасөз қызметінің мәліметіне қарағанда, сағат 10:10 шамасында "Самара – Шымкент" халықаралық тасжолының 862-шақырымында (Хромтау ауданы аумағы) MAN жүк көлігі мен Toyota Ipsum соқтығысқан.
"Жол апаты салдарынан Toyota Ipsum көлігінің жүргізушісі мен оның бес жолаушысы оқиға орнында қайтыс болды, оның ішінде үш бала бар. Алдын ала мәлімет бойынша, балалар мен олардың ата-анасы футбол жарысына басқа облысқа бара жатқан", - деп хабарлады полиция.
Аталған факті бойынша сотқа дейінгі тергеу басталды. Жол апатының себептері анықталып жатыр.
Кейінірек полиция департаментінің баспасөз қызметі Toyota Ipsum көлігінен тағы екі баланың денесі шығарылғанын хабарлады.
"Жол апаты салдарынан минивен жүргізушісі мен жеті жолаушы, оның ішінде бес бала қаза тапты", - деп хабарлады полиция департаменті.