Конституция күні қарсаңында Семейде полиция кешенді күштерінің гарнизондық тарату жиыны өтіп, оған қала әкімі Нұрбол Нұрсағатов қатысты.
"Сіздер еліміздің тыныштығы мен қауіпсіздігін сақтау жауапкершілігі жүктелген мемлекеттік орган ретінде егемен елдің тірегі болып танылдыңыздар. Сіздерге еліміздің игілігі жолындағы қызметтеріңізге табыс, дендеріңізге саулық, отбасыларыңызға амандық тілеймін", – деді Нұрбол Нұрсағатов.
Сондай-ақ, іс-шара барысында қала басшысы бірқатар тәртіп сақшыларына алғыс хаттар мен құрмет грамоталарын табыстады.
Жиын барысында қала әкімі үздік қызметі үшін Әуезов полиция бөлімшесінің инспекторы Бауыржан Артықпаевқа екі бөлмелі пәтердің кілтін табыстады.
Жиын соңыңда полицейлердің қатысуымен салтанатты марш өтті.