Қасымбектің сөзінше, 2024 жылы білім ошағын 12,5 мыңнан астам оқушы тәмамдады. Ал сол уақытта бірінші сыныпқа 28,5 мыңнан астам бала барды. Бірінші сынып оқушыларының саны түлектер санынан 2 еседен асып түседі.
Әкімнің айтуынша, осы себепті қалада жыл сайын мектептер салу қажет.
"Қаланы аралау барысында Төлебаев пен Бурабай, Құдайбердіұлы даңғылы мен Жансүгіров, Егемен Қазақстан мен Иманов көшелерінің қиылысында орналасқан бірқатар мектептің құрылыс барысымен таныстым. Өздеріңіз білетіндей, осы оқу жылының басынан бері 24 оқу орнын салып, қолданысқа бердік. Бұл – елорда үшін рекорд. Аталған мектептер екі ауысымда 66 мыңға жуық оқушы орнын ашуға мүмкіндік берді", - деп жазды Жеңіс Қасымбек Instagram-дағы парақшасында.
24 оқу орнының – 16-сы жайлы мектеп. "Жайлы мектеп" ұлттық жобасы аясында жаңа форматта 24 мектеп салынады. Бұл жайлы мектептер екі ауысымда 90 мыңға жуық оқушы орнын ашуға мүмкіндік береді.
"Жаңа оқу жылында тағы 15 мектеп ашуды жоспарлап отырмыз. Оқу орындарының құрылысына да жеке қаражат тартамыз. Сондай-ақ, жыл сайын педагог мамандығына гранттар бөле отырып, кадрлар даярлаумен айналысамыз. Қазіргі уақытта қала әкімдігінің гранты бойынша ЖОО-да 2 мың 200-ге жуық адам білім алып жүр", - деді ол.