Кейбір азаматтар жаңа кодекс қабылданған соң қазақстандықтар жаппай қолма-қол ақшаға көшуі мүмкін деген пікір айтқан болатын. Бұл туралы сұраққа жауап берген Жұманғарин:
"Қойыңыздаршы енді... Біреулер бірдеңе айтып жатыр, адамдар "кэшке өтеміз" дейді. Кім өтеді кэшке? Қайда өтеді? Үлкен чемодандармен ақша тасып жүре ме? Есеп айырыса ма солай?" – деп жауап берді.
БАҚ өкілдері кейбір дүкендерде қолма-қол төлем жасаған жағдайда жеңілдік берілетіні туралы хабарландырулар бар екенін атап өтті.
"Мен дау айтпаймын. "Кэш" – бұл заңды төлем тәсілі. Бірақ қазіргі кезде өте ыңғайсыз. Біз цифрландырылған ел болғандықтан, көптеген сервистер автоматтандырылған. Қолма-қол төлеу – уақыт жоғалту. Мен бұған күмәнданамын. Мүмкін, жекелеген кәсіпкерлер, сауда саласында жұмыс істейтіндер ғана шығар... Ал компаниялар мен заңды тұлғалар ше? Күмәнім бар... Бұл туралы кім айтып отыр өзі?" – деді ол.
Сондай-ақ ол кез келген жаңашылдық бастапқыда адамдарға ұнамайтынын атап өтті.
"Бірақ біз жасаған өзгерістер – дұрыс шешім. Мемлекеттік қаржыны тұрақтандыру қажет болды, және бұл жолдан кері шегінуге болмайды. Мұны нақты түсінуіміз керек", – деп қосты Серік Жұманғарин.
Журналистердің "қаржыны тұрақтандыруға қол жеткізілді ме?" деген сұрағына министр:
"Мәселе біртіндеп шешіліп жатыр, келесі жылы толығымен жойылады", – деп жауап берді.
Бұған дейін Шымкентте полицейлердің жүргізушіден есірткі тәркілегендігі хабарланған болатын.