Қазақстан мен Өзбекстан шекарасында орналасқан Түркістан облысындағы "Қапланбек" автокөлік өткізу бекетінде көп жеңіл көлік жиналған. МКК мәліметінше, көлік ағынының күрт артуына негізгі себеп — Құрбан айт мерекесіне орай көрші елдердің азаматтарының жаппай отанына оралуы.
"Жағдайды реттеу мақсатында екі тараптың тиісті мемлекеттік органдары жеңіл автокөліктерді өткізу мүмкіндігін арттыру бойынша келіссөздер жүргізді. Қарсы тарап шекарадан өту процесін жеделдету үшін қосымша шаралар қабылдағанын растады және көліктерді тезірек өңдеу үшін шекара мен кеден қызметкерлерінің санын екі есеге арттырды", - делінген хабарламада.
МКК ақпараты бойынша, "Қапланбек" өткізу бекетінің қалыпты күндердегі орташа тәуліктік өткізу қабілеті – екі бағыт бойынша 27 мың адам, ал мереке күндері бұл көрсеткіш 38 мың адамға дейін артады. Жеңіл көліктер бойынша – 800 көлік, мереке күндері 1 100-ден асады.
Шекарадан өтуді жоспарлап отырған адамдарға қазіргі жағдайды ескеріп, сапарларын алдын ала жоспарлау ұсынылды.
Еске салайық, бұған дейін "ҚазАвтоЖол" "Ақтөбе – Мәртөк – РФ шекарасы (Орынборға)" автожолының учаскесіндегі жағдайға қатысты түсінік берген еді.