Алдын ала мәліметке сәйкес, оқиға қаруды пайдалану кезінде жіберілген абайсыздық салдарынан болған. Жарақат алған сарбаз дереу медициналық мекемеге жеткізіліп, дәрігерлер оған қажетті көмек көрсеткен. Алайда барлық күш-жігерге қарамастан, оның өмірін сақтап қалу мүмкін болмаған.
Атырау гарнизонының баспасөз қызметі Қазақстан Республикасы Қарулы Күштерінің қолбасшылығы қаза тапқан әскери қызметшінің туған-туыстары мен жақындарына көңіл айтып, отбасына қолданыстағы заңнамаға сәйкес қажетті көмек пен қолдау көрсетілетінін мәлімдеді.
Аталған факті бойынша Ішкі істер министрлігінің Әскери-тергеу басқармасы қылмыстық іс қозғады. Қазіргі уақытта оқиғаның барлық мән-жайын анықтау үшін сотқа дейінгі тергеу амалдары жүргізіліп жатыр.
Сондай-ақ Қорғаныс министрінің тапсырмасымен оқиғаның себептерін жан-жақты әрі объективті тексеру үшін Атырауға Қорғаныс министрінің орынбасары жетекшілік ететін арнайы комиссия жіберілді. Тергеу барысы Бас әскери прокуратураның бақылауына алынған.