Бұл туралы "Қазгидромет" РМК баспасөз қызметі жариялаған синоптикалық жағдай мен қауіпті метеорологиялық құбылыстар болжамында айтылған.
"Атмосфералық фронттардың өтуіне байланысты Қазақстанның басым бөлігінде ауа райы тұрақсыз болады. Найзағай ойнап, жаңбыр жауады, кей жерлерде бұршақ жауып, жел күшейеді. Елдің шығысында және оңтүстік-шығыстың таулы аймақтарында нөсер жаңбыр жауады", – делінген хабарламада.
Қазақстанның тек солтүстік-батысында жауын-шашынсыз ауа райы сақталады.
"Республика бойынша жел күшейеді. Батыста шаңды дауыл соғады. Түнгі және таңғы уақытта солтүстікте, солтүстік-батыста және шығыста тұман түседі", – деп хабарлады "Қазгидромет" РМК баспасөз қызметі.
Болжамға сәйкес, күндіз Қазақстанның төрт өңірінде аптап ыстық болады:
- Батыс Қазақстан облысында – +35...+37°С;
- Атырау облысында – +35...+38°С;
- Маңғыстау облысында – +38...+42°С;
- Ақтөбе облысында – +35...+36°С.
Сонымен қатар бірқатар өңірде өрт қаупі жоғарылайды.
Жоғары өрт қаупі Батыс Қазақстан облысының солтүстік-батысында, Ақтөбе облысының орталығы мен солтүстік-шығысында, Жамбыл, Алматы және Павлодар облыстарының шығысында, Қостанай облысының солтүстік-батысы мен шығысында, сондай-ақ Шығыс Қазақстан облысының солтүстік-батысында сақталады.
Төтенше өрт қаупі Қызылорда, Түркістан, Жамбыл, Атырау, Батыс Қазақстан, Ақтөбе облыстарында, Алматы облысының батысы, оңтүстігі мен орталығында, Жетісу және Ұлытау облыстарында, Қостанай облысының оңтүстігі мен оңтүстік-шығысында, Маңғыстау облысының батысы мен солтүстігінде, Қарағанды облысының оңтүстігінде, Шығыс Қазақстан облысы мен Абай облысында болжанады.