Синоптиктердің мәліметінше, Қазақстанның басым бөлігінде ауқымды антициклонның әсерінен жауын-шашынсыз, негізінен құрғақ ауа райы сақталады.
"Тек елдің батысында найзағай ойнап, жаңбыр жауады. Ал оңтүстік-шығыстың таулы аймақтарында түнде жаңбыр және қар түрінде аздаған жауын-шашын күтіледі", – деп хабарлады "Қазгидромет" РМК баспасөз қызметі.
Сонымен қатар республиканың батысында, солтүстігінде, оңтүстігінде және шығысында жел күшейеді. Оңтүстікте шаңды дауыл соғуы мүмкін. Сондай-ақ елдің батысы, солтүстігі және шығысында тұман күтіледі.
Шығыс Қазақстан облысының таулы аймақтарында түнде ауа температурасы -1°С-қа дейін төмендеп, үсік жүреді.
Айта кетейік, еліміздің 11 өңірінің жекелеген аудандарында өрт қаупінің жоғары деңгейі болжанып отыр. Сегіз облыс пен тағы үш өңірдің жекелеген аудандарында өрт қаупі төтенше деңгейге жетеді.