Сот анықтағандай, 2025 жылдың желтоқсанында жұмыссыз болған сотталушы Telegram мессенджері арқылы белгісіз адаммен байланысып, одан ақшалай сыйақы үшін психотроптық заттарды таратуды ұсынған. Ол жасырын орындардың координаттарын алып, көрсетілген жерлерден орамаларды жинап, оларды Тараз аумағында жаңа жасырын орындарға орналастырып отырған. Әрбір "закладка" үшін оның криптовалюта әмиянына 2 мың теңгеден аударылған.
"2026 жылдың ақпанында куратордың нұсқауымен сотталушы Алматыдан құрамында психотроптық зат бар 37 зип-пакет салынған ораманы алып, Таразға жеткізген. Келесі күні Шанырақ алқабындағы жасырын орынға орамалардың бірін орналастырғаннан кейін оны полиция қызметкерлері ұстады. Тінту барысында одан 11,58 грамм психотроптық зат табылып, тәркіленді", – деп хабарлады сот.
Сотталушының кінәсі тергеу әрекеттерінің хаттамалары, бейнежазбалар, куәгерлердің жауаптары, сараптама қорытындылары және заттай дәлелдермен дәлелденді. Алайда ол өз кінәсін мойындамаған.
Прокурор оған рақымшылық туралы заңды қолдана отырып, бес жыл төрт ай бас бостандығынан айыру жазасын тағайындауды сұрады.
Сот ер адамды жеті жылға бас бостандығынан айыруға үкім шығарды. Алайда аталған заңды ескере отырып, түпкілікті жаза төрт жыл сегіз айға бас бостандығынан айыру болып белгіленді.
Үкім заңды күшіне әлі енген жоқ.