Жамбыл облысында шаруа қожалығының басшысын және оның қызын өлтірген күдікті ұсталды. Бұл туралы ҚР ІІМ Мемлекеттік тіл және ақпарат департаментінің директоры Алмас Садубаев айтты, деп хабарлайды ҚазАқпарат тілшісі.
«Жамбыл облыстық Ішкі істер департаментінің қызметкерлері 14 тамыз күні Шу ауданында шаруа қожалығының басшысы мен оның қызын пайдакүнемдікпен өлтірген күдіктіні ізін суытпай ұстады», - деді Алмас Садубаев.
Департамент басшысының сөзіне қарағанда, күдіктіден мотоцикль, ноутбук, ұялы телефон және ақша тәркіленді. Аталған факті бойынша сотқа дейінгі тергеу амалдары жүргізіліп жатыр.