Банкке ер адам несие тіркету үшін 72 жастағы ағасын ертіп барған. Банк қызметкерімен сөйлесіп отырған ол кенеттен үстелге басын сүйей құлады, деп хабарлайды Zakon.kz diapazon.kz-ге сілтеме жасап.
Ағасына көмекке ұмтылған ер адам оны жұлмалап, орнынан тұрғыза алмады. Оқиға орнына шұғыл жеткен жедел жәрдем қызметкерлері ол адамның көз жұмғанын айтты. 6 қыркүйекте түскі уақытта Ақтөбедегі банктердің бірінде 72 жастағы ер адам қайтыс болғанын жедел жәрдемдегілер растады.
"Біздің Владимир әрқашан адал, ақкөңіл және көңілді адам болатын", - дейді марқұмның туыстары.
- Егде жасына қарамастан, ол ешқашан денсаулығына шағымданған емес, әрдайым әрнәрсенің жақсы жағын ғана көре білетін, үнемі қалжыңдап жүретін. Шахмат ойнағанды ұнататын, үнемі жаяу жүретін, машинасы болса да. Оның бау-бақшасы бар, бәрін 40 жылдан астам бірге тату-тәтті тұрған әйелімен бірге жасайтын, - дейді олар.
Ол кісі ұзақ жылдар бойы экология департаментінде басшылық қызметтер атқарған.
