Атырауда бес жасар баласымен бірге бір әйел көпірден секірмек болды. Тәртіп сақшылары суицидтің алдын алды, деп хабарлайды zakon.kz.
Оқиға 2020 жылдың 24 шілдесіне қараған түні сағат 00:30 шамасында әскери бөлімнің бастығы кіші сержант Ерген Нұрғалиев, әскери патруль күзетшілер Дмитрий Коваленко мен Нұрсейіт Кұсайынов қоғамдық тәртіп пен қауіпсіздікті қамтамасыз ету мақсатында күзет шебінде жүргенде болған. Олар орталық көпірдің жақтауына сүйеніп тұрған баласы бар әйелдің сұлбасын байқаған. Бірден бұл туралы кезекші офицерге есеп беріп, полиция бригадасын шақырған олар әйелге қарай беттеген, деп хабарлайды ҚР Ұлттық ұланының Батыс ӨМБ баспасөз қызметі.
Кіші сержант Ерген Нұрғалиев әйелді суицид жасау райынан қайтарып, баланы қауіпсіз жерге алып шыға алған. Құқық қорғау органдарының қызметкерлері келгенге дейін тәртіп сақшылары азаматты өз бетінше сабасына түсіруге тырысты, өйткені әйел қатты ашулы еді.
Кейіннен белгілі болғандай, үйде отбасылық жанжал туындап, әйел осындай шалт әрекетке бармақ болған.