Алматы облысының аумағында тәртіп сақшылары 2021 жылғы 1-5 ақпан аралында "Мигрант" жедел алдын алу іс-шарасын жүргізді. Арнайы шараның басты мақсаты – елімізге келген шетелдіктердің қолданыстағы заңнама талаптарын қатаң сақтауын бақылау, тиісті рұқсаттарын беру мен азаматтық алу істеріне қолдау көрсету, деп хабарлайды zakon.kz Алматы облысы ПД баспасөз қызметіне сілтеме жасап.
5 күн ішінде еліміздің заңнамасын бұзудың 422 дерегі әшкере болды. Заң талаптарын өрескел бұзған 151 шетелдік азамат елден тысқары шығарылды. Жеке басын куәландыру құжаттары жоқ 80 адам қабылдау-тарату орнына қамалды. Елімізде жүру құқығына иелік етпеген 13 ТМД азаматы ел шекарасынан шығарылды, деді Алматы облысы ПД Көші-қон қызметі басқармасы бастығының орынбасары полиция полковнигі Елмұрат Нұрсейітов.
Жедел шара барысында полицейлер заңсыз көші-қон ұйымдастырудың 3 дерегін анықтаған. Қазіргі уақытта ҚР Қылмыстық кодексінің 394-бабына сәйкес сотқа дейінгі тергеу жүргізіліп, істің мән-жайы анықталуда. Сонымен қатар, 183 адам әкімшілік жауапкершілікке тартылып, әртүрлі сомада айыппұлдар арқалаған.