"Олимп" букмекерлік кеңсесінің 3,6 млрд теңгесі мемлекет қазынасына өтті. Атышулы ұйымның мүлкін тәркілеу туралы шешімді Алматының Алмалы аудандық соты шығарды, деп хабарлайды zakon.kz КТК телеарнасына сілтеме жасап.
Сот актісімен, миллиардтардан бөлек, 4 ұшақ пен 3 автокөлік те мемлекет меншігіне өтті. Мүліктің бәрін ұйымдасқан топтың қылмыстық жолмен алғаны дәлелденді. Елдегі ең ірі букмекерлік кеңсе былтыр қаңтарда жұмысын тоқтатқан. Ұйымға қатысы бар басшылары мен қызметкерлері, бас-аяғы 10 адамға халықаралық іздеу жарияланды.
Ізбасар Масақбаев, Алматы қалалық прокуратурасының бірінші басқарма басшысы:
- Алмалы ауданының соты 16-ақпанда Алматы қаласы прокурорының өтініш хатын қанағаттандырды. 12 адамға қатысты қылмыстық іс сотқа жолданған. Ол Алмалы аудандық сотында қаралуда. 10 адамға іздеу жолданды.