ҚР Қаржылық мониторинг агенттігі Павлодар облысында бір жылға жетер-жетпес бұрын құрылған қаржылық пирамида белгілері бар шағын несиелік ұйым - "Лидер Капитал 168" ЖШС-ның қызметін тоқтатты, деп хабарлайды zakon.kz.
Қысқа уақыт ішінде бұл фирма мүшелері салған салымына ай сайын 10 пайыз табыс түсетіндігіне кепілдік бере отырып, 100-ден астам адамның сеніміне кіріп, депозит аштыртқан. Қазіргі уақытта алаяқтық схемасының басқа да құрбандары анықталу үстінде, деп хабарлады агенттік.
Қаржы пирамидасын құру бойынша сотқа дейінгі тергеу басталды.
Еске сала кетейік, уәкілетті орган берген лицензия негізінде Қазақстан аумағында халықтан ақша тартуға екінші деңгейлі банктер мен поштаның ұлттық операторлары ғана қатыса алады.
ҚР Қаржы мониторингі агенттігі халықты ақшасын күмәнді компанияларға салмауға шақырады. Егер сіз де осы ұйым құрбаны болсаңыз, мына сенім телефонына хабарласыңыздар: 8 (7182) 61-33-05, 8 702 816 01 81.
