Павлодар облыстық мәслихаттың депутаты Қайрат Әбішев мас күйінде көлік жүргізді деген күдікке ілінген, деп хабарлайды zakon.kz.
Pavon.kz мәліметінше, ол медициналық тексеруден өтуден бас тартқан.
Әбішев сонымен қатар "Фуд Микс" ЖШС-нің және "Дәнекер" шаруа қожалығының директоры болып табылады. Ол Nur Otan партиясының мүшесі және ел алдындағы айрықша қызметі үшін мемлекеттік сыйлыққа ие.
Полиция департаменті 25 мамырда таңғы сағат бестер шамасында Бұқар жырау мен Исиналиев көшелерінің қиылысында полиция қызметкерлері Әбішев тізгіндеген Toyota көлігін тоқтатқанын хабарлады.
Ер адамнан құжаттарды тексеру кезінде алкогольдің иісі мүңкіп тұрған. Жүргізуші полицейлердің медициналық тексеруден өту туралы талаптарына үзілді-кесілді бас тартқан, - деді Павлодар облысы ПД жергілікті полиция бөлімінің бастығы Ғалым Сарғұлов.
Тәртіп сақшылары көліктің техникалық байқаудан өтпегенін және сақтандырылмағанын да анықтады. 42 жастағы жүргізушінің жанында жеке басын куәландыратын құжаттары болмаған және ол өзін жалған, басқа аты-жөнмен таныстырған.
- Осы заң бұзушылықтарға сәйкес, павлодарлыққа қатысты ҚР ӘҚБтК-нің 613-бабының 4-бөлігі - "Ішкі істер органдары қызметкерінің медициналық тексеруден өту туралы заңды талабын орындамау", ҚР ӘҚБтК-нің 230-бабы 1-бөлігі - "Сақтандыру шартын жасамау", ҚР ӘҚБтК-нің 612-бабы 1-бөлігі -"Жеке басын куәландыратын құжаттарынсыз көлік құралын басқару" және ҚР ӘҚБтК-нің 590-бабының 9-бөлігі - "Міндетті техникалық байқаудан өтпеген көлікті басқару" бойынша әкімшілік іс қозғалды. Оған 20 АЕК көлемінде айыппұл салынды, ол 58 340 теңгені құрайды. 613-баптың 4-бөлігі бойынша материал сотқа шешім шығару үшін жіберілді, - деді Ғалым Сарғұлов.
Іс қалалық мамандандырылған әкімшілік сотында қаралды. Сот барысында Әбішев кінәсін мойындамай, бір күн бұрын ұйықтар алдында өт тастарын кетіру үшін құрамында спирті бар тұнбаны қолданғанын айтты.
25 мамырда таңертең ол балаларға дәрі-дәрмек сатып алу үшін үйінен басқаның көлігімен шыққан, содан кейін оны полиция қызметкерлері ұстады. Ер адам құқық қорғау органдарының қызметкерлерімен кездескенде, тұнбаны қолданғандықтан өлшегіш зат спирт барын анықтауы мүмкін деп қорыққанын, сондықтан тест тапсырудан бас тартқанын, сонымен бірге өзін жаман сезінгенін айтты: көкірегі, іші ауырған.
Депутаттың сөзіне қарағанда, сараптамаға барудан бас тарту әкімшілік қамауға әкеп соқтыратынын білмеген. Сотта Қайрат Әбішев оны қамауға алмауды сұрады, өйткені өзін қажет ететін қазір жұмысшыларға жалақы төлеу және егістік науқаны тақап қалған.
Сот ер адамды ҚР ӘҚБтК-нің 613-бабының 4-бөлігімен кінәлі деп танып, 15 тәулік мерзімге әкімшілік қамауға алу және көлік құралын басқару құқығынан сегіз жылға айыру түріндегі жазаны тағайындады.
