Бөлімше командирі сақшының ержүрек әрекеті туралы «Айгөлек» балабақшасының басшылығы мен ата-анасының алғыс хатынан кездейсоқ біліпті. Мекеме директоры қиын жағдайда көрсеткен көмегі үшін әскери қызметкерге алғысын білдірді.
Оқиға өткен сәрсенбі, 16 ақпанда болған. Сол күні таңертең кіші сержант Қуаныш Бекжігітов баласымен ауруханаға бара жатып, «Айгөлек» балабақшасынан түтін шығып жатқанын байқаған. Сол кезде көмек сұрап алдынан балабақша тәрбиешісі жүгіріп шыққан. Әскери бірден көмекке жүгірген. Жақындай келе ол киім бөлмесі өртеніп жатқанын байқайды.
Қуаныш Бекжігітов өрт сөндірушілер келгенге дейін уақытты созбай, балабақша қызметкерлерімен және балалардың екі ата-анасымен бірлесіп өртті сөндіре берген. Содан кейін балаларды дереу қауіпсіз жерге көшірген.
Менің орнымда кім болса да, бәрібір осылай істер еді. Біз әскери адамбыз. Әскерилердің міндеті - бейбіт тұрғындарды қорғау. Баламен ауруханаға бара жатыр едім. Бізге бір мұғалім қобалжып, жүгіріп келді. Жағдайды естігенде ойланып тұрмай, өртті сөндіруге асықтым.Кіші сержант Қуаныш Бекжігітов
Айта кетейік, 16 ақпанда сағат 08:20 шамасында Ақтауда «Айгөлек» бақшасында өрт шыққан еді.