Шымкентте биыл қаңтар айында футбол алаңына ұшып кеткен шатыры беріктік бойынша тексеруден өткен, деп хабарлайды 24kz.
Тіпті, аяғына жетпей қалған сол күнгі ойын алдында да техникалық тексеріс жүргізіліп, ешқандай кінарат табылмаған. Сондықтан ойын барысында ұшқан шатыр шенеуніктер үшін нағыз тосын сый болды.
Ойынның тоғызыншы минутында қатты желдің салдарынан шатырдың бір бөлігі алаңға келіп жапырыла құлады.
Бақытқа орай, ойыншылар мен жанкүйерлердің ешқайсысы зардап шеккен жоқ. Ойын бірден тоқтатылды.
Футболшылар бұл ойынды алда жалғастыратын болады: сол құраммен және сол алаңда. Ал стадионның әкімшілік ғимараты бюджеттен қаражат бөлінгенге дейін шатырсыз тұра бермек.
Бұл мәселе маусым айында болатын мәслихаттың алдағы сессиясында қаралады. Әзірге, үңірейген орынды брезентпен жауып қоя тұрады. Соңғы рет шатыр 2004 жылы күрделі жөндеуден өткен.
Биыл қаңтар айында аудит жүргізілді. Шатырда қандай да бір ақау болса, жөндеу керек деген мақсатта. Бірақ ақаау анықталмады. Одан бөлек, заң бойынша адамдар көп жиналатын әрбір үлкен жарыстың алдында акт жасалады, оған ТЖ, құқық қорғау органдарының өкілдері және т.б. қатысады. Шымкент қаласы әкімінің орынбасары Мақсұт Исахов
Мақсұт Исахов футбол ойыны алдында да акт жасалғанын, ол кезде шатырға қатысты арнайы нұсқаулар болмағанын атап өтті.
