Жәбірленушінің әпкесі әлеуметтік желідегі @Патриот Караганды парақшасында оқиғаның мән-жайын баяндап берді.
Кенет қараңғыдан қарғыбаусыз дәу ит атып шықты. Ол бірден сіңіліме тап беріп, оның қолын, аяғын, ішін тістелей бастады. Ит оны екі минуттай қинады, – деді ит қапқан қыздың әпкесі Диля.
Оның айтуынша, көмек сұрап айғайлаған қызға куәгерлер барып, итті таяқпен ұрып, бұрыш баллонын қолданған.
Ит қашып кеткен. Дегенмен сәлден кейін ол жас жігіттерге тап беріпті.
Ауруханада жатқанымызда жігіттер келіп, олар да ит қуалағанын айтты. Олар көлікке тығылып үлгерген екен. Ит капотқа секіріп, көліктің алдыңғы әйнегін сындырыпты, – дейді ол.
Қалалық полицейлер жағдайға қатысты түсініктеме беріп, бұған дейін ол ауданда ит қабу фактісі бойынша шағым түспегенін атап өтті.
20 шілде сағат 00:10 шамасында Степная 4 шағын ауданындағы 15/2 үйінің жанында 14 жастағы тұрғынды ит қауып алды. Салдарынан кәмелетке толмаған бала медициналық көмекке жүгінді. Қазір жануардың иесін жауапкершілікке тарту мақсатында жедел-іздестіру шаралары жүріп жатыр. Қарағанды облысы полиция департаментінің баспасөз қызметі