Түркістан облысының полиция департаментінің мәліметінше, Сарыағаш аудандық полиция бөліміне екі әйелден шағым түскен. Арызданушылардың айтуынша, таныс әйел мемлекеттен тегін тұрғын үй алып беремін деп сенімге кіріп, екеуінен 400 мың теңге ақша алған. Алайда арада біршама уақыт өтсе де, уәдесін орындамаған, ақшаны қайтармаған.
"Бұл жайтты полицейлер ҚР ҚК-нің 190-бабы (Алаяқтық) бойынша тіркеді. Жедел-іздестіру жұмыстары нәтижесінде алаяқтыққа қатысы бар тұрғын анықталды. Ол жұмыссыз, бұрын осындай алаяқтық қылмысы үшін сотты болған әйел болып шықты", – делінген хабарламада.
Күдікті әйел тұрғындарды үй алып беремін деп сендіріп, ақшаны жаратып жіберген.
Сондай-ақ сарыағаштық полицейлер күдікті әйелдің жалпы сегіз тұрғынды алдап, ақша алғанын анықтады. Жәбірленушілерге келтірілген жалпы шығын көлемі 5 миллион теңге.
Қазіргі таңда оған қатысты сотқа дейінгі тергеп-тексеру амалдары жүргізіліп жатыр.