"Жағымды жаңалығымыз бар. 2 ақпан – Ұлттық басылым күні болып бекітілді. Бастауында Ахмет Байтұрсынұлы, Әлихан Бөкейханов, Міржақып Дулатұлы секілді ұлт зиялылары тұрған “Қазақ” газетінің алғашқы нөмірі осыдан 110 жыл бұрын, 2 ақпан күні жарық көргені белгілі. Алаш ардақтыларының қолтаңбасы қалған газет ұлттық ренессанстың қайнар көзіне айналып, халқымыздың ақыл-ойын, сана-сезімін бөлек арнаға бұрды", - деп жазды Дархан Қыдырәлі Facebook-тегі парақшасында.
Мемлекет басшысы бұған дейін Қазақ радиосының 100 жылдығы аясында 1 қазанды Радио қызметкерлері күні деп ресми түрде бекіткен. Енді бекітілген Ұлттық басылым күні де - журналистер қауымы үшін тағы бір атаулы дата.
"Баспасөз саласында еселі еңбек етіп, қалам тербеп жүрген барша әріптестерімізді ұлттық баспасөз күнінің белгіленуімен құттықтаймын!" - деді министр.
Қазақстанда Ұлттық басылым күні бекітілетіні 2023 жылдың наурыз айының ортасында белгілі болды. ҚР президенті Әкімшілігі басшысының орынбасары Аида Балаеваның тапсырмасына байланысты мерекенің жаңа күні енгізіліп жатқаны хабарланды.
