21 шілде күні сағат 17:30-да халықаралық маңызы бар Алматы-Екатеринбург тас жолының Қарағанды облысындағы учаскесінде жолаушылар тасымалдайтын автобус аударылып қалды. Оқиға Осакаровка ауылынан 10 шақырым жерде болды. Бұл туралы облыстық Полиция департаменті хабарлады.
Оқиға орнынан түсірілген видео dorogi_karagandy парақшасында жарияланған. Кадрларда жол апатынан кейін аударылған автобусты көруге болады.
Yutong автобусының ("Алматы-Астана" бағыты, салонда 20 адам болған) 33 жастағы жүргізушісі соққан қатты желдің салдарынан рульді басқара алмай, аударылып кетуге жол берген".Қарағанды облысы Полиция департаментінің баспасөз қызметі
Оқиға салдарынан автобустың 65 жастағы жолаушысы зардап шекті. Ол оқиға орнынан ауруханаға жеткізілді.
Жол-көлік оқиғасы фактісі тіркеліп, қажет сараптамалар тағайындалды. Зерттеу нәтижесінен кейін процессуалдық шешім қабылданады.
