Қоғамдық көліктің сапасы мен жылдамдығына қойылатын талаптар өсіп келеді. Бұл туралы Алматы әкімі Ерболат Досаев ҚР президенті Қасым-Жомарт Тоқаевқа есеп беру барысында айтты. Оның айтуынша, метроның мегаполисте сұранысқа ие болуы жерасты маршруттары желісінің ұлғаюымен жолаушылар ағынының өсуін дәлелдейді.
"Былтыр мамыр айында 2 жаңа станция ашылғаннан кейін жолаушылар ағыны күн сайын 35 мыңнан 90 мыңға дейін 2,6 есе өсті. Биыл қыркүйек айынан бастап 3 жылжымалы состав қосылады. Бұл қозғалыс аралығын 6 минутқа дейін төмендетуге мүмкіндік береді", – деді Алматы әкімі Ерболат Досаев.
Қала басшысы 2025 жылы "Қалқаман" станциясының құрылысын аяқтау жоспарланғанын, батыс бағытта "Барлық" базарына дейін 3 жаңа станцияның жобалау-сметалық құжаттамасы әзірленіп жатқанын айтты.