Полицейлердің мәліметінше, 6 қыркүйек күні кешке Әл-Фараби АПБ-ның учаскелік инспекторы отбасылық жанжал жөнінде шақырту түскен мекен-жайға барды. Жергілікті тұрғын күйеуі ұрғанын айтып, шағымданған.
Оқиға орныны жеткен учаскелік полицей пышақ ұстап тұрған үй иесін көрген. Тәртіп сақшысы одан пышақты тастауды талап еткенде, мас ер адам оған шабуыл жасап, мойны мен қолын жарақаттаған.
"Полиция қызметкері әріптесінің көмегімен қаскүнемді қарусыздандырды. Аталған жайтты тергеушілер Қылмыстық кодекстің 380-бабы 3-бөлігі "Билік өкілінің өз қызметтік міндеттерін атқаруына байланысты өміріне немесе денсаулығына қауіпті емес күш қолдану" бойынша тіркеді", – делінген Түркістан облысының полиция департаменті таратқан хабарламада.
Күдікті 2015 жылы осы баптың бірінші бөлігімен қылмыстық жауапкершілікке тартылған. Сонымен қатар бұрын әйелінің денсаулығына зиян келтіргені үшін әкімшілік қамауға алынып, полицияның есебінде тұрған.
Ер адам қазір қамауда. Сотқа дейінгі тергеу амалдары жүргізілуде.