Lada.kz-тің ақпаратынша, мектеп басшылығы ата-аналардың барлық шағымын жоққа шығарған. Бірақ дезинсекциялау үшін санитарлық-эпидемиологиялық қызметке жүгінген.
"Көп оқушыны шағып тастаған. 1-сынып оқушысының қалтасынан да қандала табылды. Ал директор керісінше айтады. Олар бұл кәдімгі қоңыз дейді. Кейінірек басшылық қандалаға қарсы дезинсекция жүргіздік деп хабарлаған. Бірақ олай емес, балаларды қатты шағып тастаған. Біз мектептен барлық қабатты кәдімгідей дезинсекциялап, директорды ауыстыруды талап етеміз", - делінген ата-аналардың хабарламасында.
Ақтау қалалық Білім бөлімі мектептегі барлық кабинетті тексеріп, мұғалімдермен де сөйлескенін түсіндірді.
"Ешқандай фактілер анықталмағанын атап өтеміз. Мектепте жүйелі профилактикалық дезинфекциялық іс-шаралар уақытылы жүргізілген. Кейінгісі 3 қарашада жаңа тоқсан басталғанға дейін жасалған. Алайда ата-аналардың алаңдаушылығын ескере отырып, мектеп басшылығы қосымша дезинфекция жүргізу туралы өтінішпен Санитарлық-эпидемиологиялық қызметке (СЭС) хабарласуды ұйғарды", - деді Ақтау қалалық Білім бөлімінің баспасөз қызметі.
Қазан айында Ақтауда пәтерлердің бірін залалсыздандыру кезінде санитарлық норманың бұзылуынан 7 адам зардап шекті. Уланып, 2 бала қайтыс болды. Алайда осы оқиғадан соң бір аптадан кейін қалада тағы да бес адам уланған болып шықты. Алматыда қандала шағуына байланысты шағым жиілеп кетті.
