Жетісу облысы Ескелді аудандық соты 9-сынып оқушысын қағып өлтірген Кербұлақ ауданы Көксу ауылдық округінің әкімі Әлия Бақтияроваға қатысты үкім шығарды.
Соттың баспасөз қызметінің хабарлауынша, 2023 жылдың 2 қарашасында сағат 20:00 шамасында Кербұлақ ауданы Көксу ауылдық округінің әкімі Әлия Бақтиярова көшеден өтіп бара жатқан 9-сынып оқушысы Асыл Тұрсынбайды қағып кеткен. Соқтығыс болған кезде көлік Боранбаев көшесімен батыс бағытта келе жатқан.
Прокурор сотталушыны 5 жыл мерзімге көлік құралдарын басқару құқығынан айыра отырып, 2 жыл 6 ай мерзімге бас бостандығынан айыруды сұрады. Сотта Бахтиярова өз кінәсін толық мойындап, өкінді.
Сот оны ҚР Қылмыстық кодексінің 345-бабы 3-бөлігі бойынша ("Абайсызда адам өліміне әкеп соққан көлік құралын басқаратын адамдардың жол қозғалысы немесе көлік құралдарын пайдалану ережелерін бұзуы") кінәлі деп тапты. Ол 5 жыл мерзімге көлік құралдарын басқару құқығынан айыра отырып, 2 жыл 6 айға бас бостандығынан айырылды.
Шешім шығарған кезде сот жауаптылықты жеңілдететін мән-жайларды: кінәсін толық мойындауды, моральдық және материалдық шығынды өтеуді, Бахтиярованың асырауында өзі жалғыз асырайтын кәмелетке толмаған бес баласының болуын және жәбірленушілердің жағдайын ескерді.
Үкім заңды күшіне енген жоқ.
2023 жылдың 6 қарашасында әлеуметтік желілерде Жетісу облысы Кербұлақ ауданы Көксу ауылдық округінің әкіміне тиесілі делген мектеп оқушысы көліктің дөңгелегі астында қаза тапты деген ақпарат пайда болды.
