Оның айтуынша, білім беру саласындағы сыбайлас жемқорлықтың жүйелі фактілерінің жолын кесу жұмыстары жалғасуда.
"2023 жылдың басынан бері осы салада барлығы 229 қылмыстық іс тіркелген. Олар бойынша шығын 15 миллиард теңгеден асты. Ұрлықтың ең көп сомасы Жетісу, Түркістан, Қызылорда, Алматы, Ақтөбе облыстары мен Алматы қаласында анықталды. Қылмыс жасауда 317 адам әшкереленді, оның ішінде 144 адам сотталып, түрлі жазалау шаралары қолданылды", – деді Данияр Бигайдаров.
Ол Ақтөбе облысы бойынша Сыбайлас жемқорлыққа қарсы қызмет Шалқар ауданының білім бөлімінің басшысына қатысты қылмыстық істі тергеп жатқанын хабарлады.
"Ол аудандық жалпы білім беретін мектептің директоры арқылы ведомстволық бағынысты ұйымдардың басшыларынан қызметтегі жалпы қамқорлығы үшін жалпы сомасы 18,5 миллион теңге пара алды деп күдіктелуде. Соттың санкциясымен білім бөлімінің басшысы мен аудандық мектеп директоры қамауға алынды", - деп толықтырды ведомство өкілі.