KTK ақпаратынша, бұл мәліметті сот процесі кезінде оның құқығын қорғаған адвокаты Ғазиз Ынтықбаев растап отыр.
Ағасының қылмысын жасырамын деп, басы дауға қалған Байжанов биыл жаздан бастап шартты түрде мерзімінен босату туралы өтінішін білдіруге құқылы. Мұндай мүмкіндікті ол сотқа тікелей емес, түрме әкімшілігі арқылы өтініш жасап пайдалана алады. Яғни түзету мекемесі сотталған азаматтың осы уақыт аралығындағы мінездемесі мен жүріс-тұрысы жайында бар мәліметті жинап, Байжанов жазасын өтеп жатқан Степногор қаласындағы сотқа тапсырады. Одан кейін ғана сотталушының ендігі тағдыры белгілі болмақ. Дегенмен заңгердің айтуынша, ол рақымшылыққа ілінгенімен, қылмыстық жауаптан толық босатылмайды.
"Бұл жерде Байжановқа тағайындалған жазаның үштен бір бөлігі алынып тасталынуы мүмкін. Яғни жазасын өтеп жатқан мекеме Степногорск қаласындағы сотқа тиісті ұсыныспен шығуы керек. Құжат жинап, сот арқылы жүзеге асырылуы керек". Ғазиз Ынтықбаев, Б.Байжановтың адвокаты
Еске салсақ, жеңгесінің өлімін жасырып қалғаны үшін 4 жылға бас бостандығынан айырылған Байжанов та, ағасы Қуандық Бишімбаев та қазір Степногорда. Тек сотталған баптарына байланысты әр түрлі түзеу мекемесінде жазасын өтеп жатыр.