"Қонақжайлық көрсетіп, мазмұнды келіссөз жүргізгені үшін БАӘ Президенті Шейх @MohamedBinZayed алғыс айтамын. Келіссөз қорытындысы бойынша маңызды келісімдерге қол қойылды", деп жазды Қазақстан Президенті Twitter-дегі парақшасында.
Айта кетсек, Қасым-Жомарт Тоқаевты салтанатты қарсы алу рәсімі "Әл-Уатан" сарайында өтті. Мемлекет басшысының құрметіне 21 рет зеңбіректен оқ атылып, Қазақстанның әнұраны орындалды. Қасым-Жомарт Тоқаев пен шейх Мұхаммед бен Заид Әл Нахаян бір-біріне ілтипат білдіріп, Құрмет қарауылының бастығы мемлекеттер басшыларына рапорт берді. Президенттер екі елдің ресми делегация мүшелерін таныстырғаннан кейін Қасым-Жомарт Тоқаев Құрметті қонақтар кітабына қолтаңба қалдырды.
Салтанатты қарсы алу рәсімінен кейін екі ел басшылары кеңейтілген құрамда келіссөз жүргізіп, бірқатар құжаттарға қол қойғаны хабарланған болатын. Одан кейін қос елдің басшысы бірлескен мәлімдеме жасады.
