Алматы қалалық тергеу сотының 2022 жылғы 17 шілдедегі қаулысы бойынша Алматы бойынша Экономикалық тергеу департаменті тергеушісінің күзетпен ұстау түріндегі бұлтартпау шарасына санкция беру туралы өтініші қанағаттандырылмады. Оның орнына күдіктіге қатысты екі ай мерзімге, яғни 17 қыркүйекке дейін үйқамақта болу шарасы тағайындалды, деп хабарлады тергеу сотының баспасөз қызметі.
Бұған дейін хабарланғандай, алматылық адвокат өзін белгісіз адамдар аңдып жүргеніне шағымданды. Ол әріптесі - Бурхан Жансейітовтен көмек сұрады. Оқиға орнына жеткен ол аңдушылардың көлігін көлейгейлеп, тырп еткізбей тастаған. Кейін полиция қызметкерлері оларды полиция бөліміне әкеліп жеткізді.
Қаржы мониторингі агенттігі олардың қызметкерлері рейдерлік шабуыл бойынша күдіктілерге қатысты аңду жүргізгенін мәлімдеді. Бұрхан Жансейітов оларға кедергі жасамақ болған.