Қызылорда облысы бойынша Қылмыстық-атқару жүйесi департаментінің баспасөз қызметінің хабарлауынша, №60 мекемеде жазасын өтеп жатқандарға келген сәлем-сауқаттарды қабылдау барысында қызметкерлер "ерекше" сәлемдемені тауып алған. 35 қалташадағы емдік шай қалташаларының құрамы алмастырылып, орнына ұнтақ тәріздес әрі ерекше иісі бар зат салынған болып шықты.
Бұл дерек жедел түрде "102" арнасына хабарланып, мекемеге Қызылорда қалалық полиция басқармасының жедел-тергеу тобы шақыртылды. Тыйым салынған зат тәркіленіп, сот-химиялық сараптама тағайындалды. Оның қорытындысымен күдік тудырған ұнтақтың 47 грам кептірілген марихуана екені анықталды.
Аталған дерекке қатысты Қазақстан Республикасы Қылмыстық кодексінің 297-бабының 1-бөлігі (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) бойынша сотқа дейінгі тергеп-тексеру жұмыстары жүргізіліп жатыр.