Оңтүстік Кореядағы президент сайлауында оппозициялық кандидат Юн Сок Ёль жеңіске жетті. Бұрынғы Бас прокурор халықтың 48,59% дауысын ала алды. Бұл туралы The Korea Times хабарлады.
Дауыс беруші халықтың 77%-дан астамы сайлауға қатысты. Сайлау күні демалыс болып жарияланды. Коронавируспен ауыратындар үшін бөлек дауыс беру ұйымдастырылды.
61 жастағы Юн Сок Ёль бұл нәтижені жеке өзінің немесе партияның жеңісі емес, «халықтың жеңісі» деп атады. Ол басқа кандидаттарға алғысын білдіріп, Демократиялық партиямен «халыққа жақсырақ қызмет ету үшін» жұмыс істеуге уәде берді.
Сайланған президент жаңа жұмыс орындарын ашуды, бизнес жағдайын жақсартуды, мемлекеттік органдарды оңтайландыруды және пандемия кезінде ел экономикасын қалпына келтіруді көздеп отыр.
Юн Сок Ëль 10 мамырда ғана қазіргі президент Мун Чжэ Иннің орнын басады. Оған дейін ол қазіргі президенттен өкілеттіктерді беру жөніндегі комитет құрады.