Мемлекет басшысы "Қазақстан Республикасының кейбір заңнамалық актілеріне көлік және жер қойнауын пайдалану мәселелері бойынша өзгерістер мен толықтырулар енгізу туралы" Қазақстан Республикасының Заңына қол қойды, делінген Ақорда хабарламасында.
Заң жобасы автокөлікті бақылауды автоматтандыруға, поездардың жолдан шығып кетуі немесе соқтығысу оқиғаларын, сондай-ақ кемелердің авариялық жағдайын тергеу тәртібін жетілдіруге бағытталған. Сонымен қатар бұл құжат Қазақстан Республикасының заңнамасын Халықаралық азаматтық авиация ұйымының стандарттары мен Еуропалық Одақтың авиациялық талаптарына сәйкес келтіруді көздейді, делінді Сенатта 22 қарашада аталған заң жобасы талқысы кезінде.
Сонымен қатар заң жобасының нормалары әуе айлағы маңындағы аумақта қызмет атқаруға рұқсат алу тетігін реттеуді өзгертуді және күрделі жобалар бойынша жер қойнауын пайдалану саласына инвестиция тартуды көздейді.
Одан бөлек Мемлекет басшысы "Қазақстан Республикасының Қылмыстық-процестік кодексіне сот алқабилердің қатысуымен қарайтын істер санаттарын кеңейту бойынша өзгерістер енгізу туралы" Қазақстан Республикасының Заңына қол қойды.
Заң жобасы Президенттің 2022 жылғы 16 наурыздағы Жолдауын орындау шеңберінде әзірленді және оны депутаттар биыл 9 қарашада ҚР Парламенті Мәжілісінің жалпы отырысында бірінші оқылымда-ақ мақұлдады.