Қарағанды облысындағы "Қазақстан" шахтасында болған қайғылы оқиғаларға байланысты өңірлік полиция департаменті тау-кен жұмыстарын жүргізу кезінде қауіпсіздік ережелерін бұзу фактісі бойынша сотқа дейінгі тергеуді бірден қолға алғаны нақтыланады.
Қылмыстық істі тергеу үшін осы санаттағы істерді тергеу тәжірибесі бар қызметкерлер қатарынан тергеу тобы құрылды. Тергеудің объективтілігін қадағалауды жүзеге асыру үшін іс жүргізу прокуроры тағайындалды.
Қазақстан Республикасы Төтенше жағдайлар министрінің төрағалығымен жазатайым оқиғаның себептерін тергеу және оның салдарын жою үшін үкіметтік комиссия құрылды. Оған мамандар, оның ішінде шет мемлекеттердің бейінді зерттеу орталықтарының сарапшылары тартылды.
"Комиссия қорытындысы шыққанға дейін кез келген болжамды алға тарту орынсыз әрі объективті тергеу барысына араласу ретінде бағаланады, өйткені шахта мен онда орнатылған жабдықтар зерттелмеген, өрт салдарын жою бойынша жұмыстар әлі жүргізіліп жатыр", делінген полиция хабарламасында.
Көрінеу жалған ақпарат таратқаны және қылмыстық істі объективті тергеуге кедергі келтіргені үшін Қазақстан Республикасының заңнамасында қылмыстық жауапкершілік қарастырылатынын еске саламыз.
"Азаматтардан қауесеттер мен арандатуларға бой ұрмауға, тек ресми ақпаратқа сенуді сұраймыз". Қарағанды облысы ПД баспасөз қызметі
17 тамызда Қарағанды облысында "АрселорМиттал Теміртау" АҚ-ға қарасты "Қазақстан" шахтасында өрт болды: конвейерлік таспа өртенді. Оқиға орын алғанда шахтада 227 адам болған, олардың 222-сі жер бетіне шығарылды. Тағы бес кенші жер астында қалып кетіп, мерт болды.
Бұған дейін "Қазақстан" шахтасында соңғы тексеру барысында қанша бұзушылық анықталғаны белгілі болды.
Кейін ТЖМ басшысы шахтадағы өртті сөндіру неге ұзаққа созылғанын түсіндірді.
Сондай-ақ, өрттің себептерін тергеуге шетелдік сарапшылар тартылатыны белгілі болды.
