Санитариялық қағидаларды немесе гигиеналық нормативтерді бұзу ықтималдылығына байланысты асхананы жалға алушыға қатысты сотқа дейінгі тергеп-тексеру жүргізіліп жатыр.
"Аталған фактіге сәйкес, 2023 жылдың 11 қазанында Өскемен қалалық ПБ Үлбі полиция бөлімі ҚР Қылмыстық кодексінің 304-бабы, 1-бөлігі, яғни "Санитарлық ережелерді немесе гигиеналық нормативтерді бұзу" бойынша сотқа дейінгі тергеп-тексеруді бастады. Қажетті сараптамалар мен зертханалық зерттеулер тағайындалды, олардың нәтижелері бойынша тиісті шешім қабылданады", - делінген ПБ хабарламасында.
Бұған дейін "Өскемен көпсалалы технологиялық колледжі" КММ-ның оншақты бірінші курс студенттері жедел жәрдем көлігімен "Ана мен бала" орталығына жеткізілгені хабарланған болатын. Барлық студенттерге "тағамдық токсикоинфекция" диагнозы қойылды. Науқастар тексеруден кейін амбулаториялық емделуге жіберілді.
Өткен жылы Рудныйдағы тау-кен технологиялық колледжінде осыған ұқсас оқиға орын алған. Санитарлық нормаларды сақтамау салдарынан асханада 14 студент уланған. 2023 жылдың 7 тамызында сот колледж асханасын жалға алушы - "S-Salta" ЖШС басшысына қатысты үкім шығарды.